عمران خان کا دوٹوک بیان: بیٹے احتجاج کے لیے پاکستان نہیں آئیں گے
اڈیالہ جیل میں جاری عدالتی کارروائی کے دوران چیئرمین تحریک انصاف اور سابق وزیر اعظم عمران خان نے واضح کر دیا ہے کہ ان کے بیٹے قاسم اور سلیمان احتجاج کے لیے پاکستان نہیں آئیں گے۔
حالیہ دنوں میں سوشل میڈیا اور بعض حلقوں میں یہ اطلاعات گردش کر رہی تھیں کہ عمران خان کے بیٹے والد کی رہائی کے لیے احتجاج میں شرکت کے لیے پاکستان آ رہے ہیں، تاہم آج کی عدالتی سماعت میں عمران خان نے ان خبروں کی سختی سے تردید کر دی۔
ذرائع کے مطابق، سماعت کے دوران جب ان سے پانچ اگست کو تحریک انصاف کی ممکنہ احتجاجی تحریک اور بیٹوں کی شرکت سے متعلق سوال کیا گیا، تو انہوں نے واضح الفاظ میں جواب دیا:
"نہیں، وہ احتجاج کے لیے نہیں آئیں گے۔”
یہ بیان ایسے وقت میں سامنے آیا ہے جب پی ٹی آئی کی چند مقامی قیادت اور عمران خان کی ہمشیرہ علیمہ خان کی جانب سے یہ تاثر دیا گیا تھا کہ قاسم اور سلیمان والد کی حمایت میں عوامی تحریک کا حصہ بننے پاکستان آ سکتے ہیں۔
تاہم عمران خان کے اس تازہ موقف نے ان تمام قیاس آرائیوں کو ختم کر دیا ہے، اور واضح کر دیا ہے کہ پارٹی کی سیاسی جدوجہد مکمل طور پر عوامی حمایت اور مقامی قیادت کے ذریعے ہی آگے بڑھے گی۔
عمران خان کے اس موقف سے یہ بات بھی عیاں ہوتی ہے کہ وہ پارٹی کو خاندانی سیاست سے دور رکھنا چاہتے ہیں اور تحریک انصاف کی عوامی جدوجہد کو اصولوں اور جمہوریت کے دائرے میں رکھ کر ہی کامیابی کی طرف لے جانا چاہتے ہیں۔
البتہ اگر ان کے بیٹے ذاتی طور پر والد سے ملاقات کے لیے پاکستان آتے ہیں، تو انہیں قانونی طور پر یہ حق حاصل ہے، اور ماضی میں بھی ایسے مواقع پر ملاقاتوں کی اجازت دی جاتی رہی ہے۔
