گورنر خیبرپختونخوا فیصل کریم کنڈی نے کہا ہے کہ عدم اعتماد ایک جمہوری حق ہے اور اگر حکومت سینیٹرز بنا سکتی ہے تو اب عدم اعتماد لا کر دکھائے گی۔ انہوں نے صوبائی حکومت پر شدید تنقید کرتے ہوئے کہا کہ خیبرپختونخوا میں قانون و امن کی صورتحال تشویشناک ہے مگر حکومت اسے تسلیم کرنے کو تیار نہیں۔
میڈیا سے گفتگو میں گورنر نے کہا کہ اٹھارہویں ترمیم کے بعد صوبائی حکومت چاہے تو فوج یا فرنٹیئر کانسٹیبلری (ایف سی) کی مدد لے سکتی ہے، مگر موجودہ صورتحال کے باوجود وزیراعلیٰ غیر سنجیدہ رویہ اپنائے ہوئے ہیں۔ انہوں نے کہا:
"کرم میں ایک سال سے حالات خراب ہیں لیکن کوئی سنجیدہ اقدام نہیں لیا گیا۔”
گورنر نے وزیراعلیٰ پر سخت تنقید کرتے ہوئے کہا کہ اگر وہ لوگوں کو گرفتار کر کے بعد میں چھوڑ دیتے ہیں تو یہ ان کی کمزور حکمرانی کی نشانی ہے۔ انہوں نے کہا:
"اگر آپ کی رٹ نہیں، تو بہتر ہے استعفیٰ دے دیں اور دوسروں کو الزام دینا بند کریں۔”
فیصل کریم کنڈی نے پولیس کی صلاحیتوں کو سراہتے ہوئے کہا کہ انہیں وسائل اور سازوسامان کی فراہمی حکومت کی ذمہ داری ہے۔ اگر فوج کی مدد نہیں لینی تو پولیس کو مکمل اختیارات اور وسائل دینا ضروری ہے۔
انہوں نے صوبائی اسمبلی میں اہم امور پر مؤثر بحث نہ ہونے کی طرف بھی اشارہ کیا اور کہا کہ مسائل کے حل کے لیے مرکز اور صوبے کو ایک پلیٹ فارم پر آنا ہوگا۔
تحریک انصاف کے 5 اگست کو احتجاجی تحریک شروع کرنے کے اعلان پر گورنر کا کہنا تھا کہ یہ ایک سیاسی شوشہ ہے اور عملی طور پر کچھ نہیں ہوگا۔
