اسلام آباد (نمائندہ خصوصی) — ایران کے نو منتخب صدر، مسعود پزشکیان، 26 جولائی کو ایک اہم سرکاری دورے پر پاکستان پہنچیں گے۔ یہ دورہ دونوں برادر اسلامی ممالک کے درمیان دو طرفہ تعلقات، تجارت، سیکیورٹی تعاون اور علاقائی ترقی کے امور پر گفت و شنید کے لیے غیر معمولی اہمیت کا حامل تصور کیا جا رہا ہے۔
دورے کی تفصیلات کے سلسلے میں پیر کے روز ایران کے وزیر داخلہ سکندر مومنی اور پاکستان کے وفاقی وزیر داخلہ محسن نقوی کے درمیان ٹیلیفونک گفتگو ہوئی، جس میں ایرانی صدر کے مجوزہ دورے پر تفصیلی تبادلہ خیال کیا گیا۔
وفاقی وزیر داخلہ محسن نقوی نے اس موقع پر کہا:
"ہم ایرانی صدر مسعود پزشکیان کے دورہ اسلام آباد کے منتظر ہیں۔ یہ دورہ پاکستان اور ایران کے درمیان باہمی تعلقات کو مزید مضبوط کرنے میں سنگِ میل ثابت ہوگا۔”
ایران کی پاکستان سے یکجہتی
ایرانی وزیر داخلہ سکندر مومنی نے پاکستان میں حالیہ سیلاب سے ہونے والے جانی و مالی نقصان پر افسوس کا اظہار کرتے ہوئے کہا کہ:
"مشکل کی اس گھڑی میں ایرانی حکومت اور عوام، پاکستانی بھائیوں کے شانہ بشانہ کھڑے ہیں۔”
انہوں نے سیلاب متاثرین کے لیے ایران کی جانب سے ہر ممکن امداد فراہم کرنے کی یقین دہانی کرائی۔
خیرسگالی کے جذبات کا اظہار
سکندر مومنی نے محسن نقوی کے حالیہ دورہ ایران پر ان کا شکریہ ادا کرتے ہوئے دونوں ممالک کے درمیان قریبی تعاون کو سراہا۔ انہوں نے کہا کہ ایران اور پاکستان کے درمیان دیرینہ تعلقات کو مزید مستحکم کرنے کا وقت آ چکا ہے۔
ماہرین کے مطابق ایرانی صدر کا یہ دورہ نہ صرف دونوں ممالک کے درمیان اقتصادی اور تجارتی سرگرمیوں کو فروغ دے گا بلکہ خطے میں استحکام اور ہم آہنگی کی نئی راہیں بھی ہموار کرے گا۔
