اسلام آباد: ملک کی اہم کاروباری شخصیات نے فیلڈ مارشل جنرل عاصم منیر سے خصوصی ملاقات کی، جس میں ملکی معیشت کی موجودہ صورتحال، مستقبل کے معاشی چیلنجز اور ترقی کے امکانات پر تفصیلی گفتگو کی گئی۔ اس اہم ملاقات کی قیادت سابق نگراں وفاقی وزیر گوہر اعجاز نے کی۔
ملاقات میں معروف کاروباری تنظیموں کے سربراہان شریک ہوئے، جن میں آل پاکستان ٹیکسٹائل ملز ایسوسی ایشن (APTMA) کے چیئرمین کامران ارشد، ایس ایم تنویر، وفاق ایوان ہائے صنعت و تجارت پاکستان (FPCCI) اور لاہور چیمبر آف کامرس اینڈ انڈسٹری کے صدور شامل تھے۔
گوہر اعجاز نے فیلڈ مارشل کو بریفنگ دیتے ہوئے بتایا کہ کاروباری برادری حکومت کی معاشی پالیسیوں کی مکمل حمایت کرتی ہے اور ملکی معیشت کو استحکام دینے کے لیے ہر ممکن تعاون فراہم کرنے کے لیے تیار ہے۔ انہوں نے اس بات پر زور دیا کہ حکومت کاروباری ماحول کو مزید سہل بنائے تاکہ سرمایہ کاری میں اضافہ ہو اور صنعتی سرگرمیاں فروغ پائیں۔
انہوں نے معاشی اصلاحات کے عمل کو تیز کرنے، شرح سود کو مہنگائی کے تناسب سے کم کرنے اور وفاقی بجٹ میں کاروباری برادری کے تحفظات کو دور کرنے کی ضرورت پر بھی زور دیا۔ گوہر اعجاز نے کہا کہ حکومت اپنے وعدوں کی پاسداری کرتے ہوئے برآمدات پر مبنی معیشت کو مزید مضبوط بنائے۔
ملاقات کے دوران زرعی شعبے کی بہتری پر بھی گفتگو ہوئی۔ گوہر اعجاز نے کپاس کی صنعت اور کسانوں کی فلاح کے لیے خصوصی اقدامات کرنے کی تجویز دی تاکہ زرعی معیشت کو بھی مستحکم بنیادوں پر استوار کیا جا سکے۔
یہ ملاقات ایک مثبت پیش رفت کے طور پر دیکھی جا رہی ہے، جس سے واضح ہوتا ہے کہ ملک کی کاروباری قیادت اور اسٹیبلشمنٹ ایک صفحے پر ہیں اور معاشی استحکام کے لیے مشترکہ لائحہ عمل پر کام کرنے کے لیے پُرعزم ہیں۔
