پشاور – پاکستان تحریک انصاف (پی ٹی آئی) نے خیبر پختونخوا اسمبلی کے آج ہونے والے اجلاس کا بائیکاٹ کرنے کا اعلان کیا ہے۔ یہ فیصلہ پارٹی کی پارلیمانی پارٹی کے اہم اجلاس میں کیا گیا، جس کی صدارت وزیر اعلیٰ خیبر پختونخوا علی امین گنڈا پور نے کی۔
اجلاس اس وقت بلایا گیا جب اسمبلی میں مخصوص نشستوں سے متعلق اہم کارروائی متوقع تھی۔ تاہم اسمبلی اجلاس دو گھنٹے سے زائد تاخیر کے بعد شروع ہوا۔ اپوزیشن اراکین تو ایوان میں موجود تھے، مگر پی ٹی آئی اراکین کو اسمبلی ہال کے بجائے پارلیمانی پارٹی کے مشاورتی اجلاس میں شرکت کی ہدایت دی گئی۔
پارلیمانی پارٹی کے اجلاس میں مخصوص نشستوں کی تقسیم، انتخابی عمل میں مبینہ بے ضابطگیوں اور سیاسی مداخلت پر شدید تحفظات کا اظہار کیا گیا۔ اجلاس کے بعد پی ٹی آئی نے اسمبلی اجلاس کے بائیکاٹ کا اعلان کرتے ہوئے اسے "سیاسی پیغام” قرار دیا۔
پی ٹی آئی ذرائع کے مطابق، پارٹی کا موقف ہے کہ مخصوص نشستوں کے معاملے پر ان کے ساتھ انصاف نہیں کیا گیا اور ان کا بائیکاٹ ان خدشات کے اظہار کا ایک اہم قدم ہے۔
دوسری جانب، تاحال حکومت یا اسپیکر اسمبلی کی جانب سے پی ٹی آئی کے اس فیصلے پر کوئی باقاعدہ ردعمل سامنے نہیں آیا۔ تاہم سیاسی مبصرین اس بائیکاٹ کو خیبر پختونخوا کی پارلیمانی سیاست میں ایک اہم موڑ قرار دے رہے ہیں، جو آنے والے دنوں میں مزید کشیدگی کو جنم دے سکتا ہے۔
