پشاور:
خیبرپختونخوا میں سینیٹ انتخابات کے حوالے سے ایک اہم پیش رفت سامنے آئی ہے، جہاں صوبائی حکومت اور اپوزیشن جماعتوں نے بلا مقابلہ انتخابات کرانے پر اصولی اتفاق کر لیا ہے۔ اس فیصلے کا مقصد سیاسی کشیدگی کو کم کرنا اور تمام جماعتوں کے امیدواروں کی کامیابی کو یقینی بنانا ہے۔
ذرائع کے مطابق، حکومتی و اپوزیشن رہنماؤں کے درمیان رات گئے تک جاری مذاکرات میں 6/5 کے فارمولے پر اتفاق ہوا ہے، جس کے تحت تحریک انصاف کو 6 نشستیں اور دیگر اپوزیشن جماعتوں کو 5 نشستیں دی جائیں گی۔
تاہم، پی ٹی آئی کے داخلی معاملات اور بعض امیدواروں کی دستبرداری جیسے چند امور پر ابھی مشاورت جاری ہے۔ اس سلسلے میں وزیراعلیٰ خیبرپختونخوا علی امین گنڈاپور کو پارٹی امیدواروں کو قائل کرنے کی اہم ذمہ داری سونپی گئی ہے۔
حکومتی ذرائع کا کہنا ہے کہ یہ حکمت عملی سیاسی تنازعات اور غیر یقینی صورتحال سے بچاؤ کے لیے اپنائی گئی ہے، جبکہ اپوزیشن جماعتیں بھی مشترکہ امیدواروں پر اتفاق کر کے انتخابات کو پرامن بنانے کی خواہاں ہیں۔
امکان ہے کہ آج ہونے والی آخری ملاقات میں معاہدے پر دستخط ہو جائیں گے، جس کے بعد تمام 11 نشستوں پر بلا مقابلہ انتخاب کا باضابطہ اعلان کیا جائے گا۔
واضح رہے کہ خیبرپختونخوا سے سینیٹ کی 11 نشستیں 21 جولائی کو خالی ہو رہی ہیں، جن میں 7 جنرل، 2 خواتین اور 2 ٹیکنوکریٹ نشستیں شامل ہیں۔
اگرچہ تمام فریقین بلا مقابلہ انتخاب پر متفق ہیں، لیکن چند تکنیکی اور داخلی معاملات کی حتمی منظوری باقی ہے، ورنہ ووٹنگ کی صورت میں سیاسی عدم استحکام کا خدشہ موجود ہے۔
