اسلام آباد:
پاکستان تحریک انصاف (پی ٹی آئی) کی پارلیمانی پارٹی نے اپنے کارکنوں کو پارٹی کے اندر اختلافات ختم کرنے اور تمام تر توجہ بانی چیئرمین عمران خان کی رہائی پر مرکوز رکھنے کی ہدایت کی ہے۔ یہ ہدایات پارٹی چیئرمین بیرسٹر گوہر علی خان نے پارلیمانی اجلاس کے بعد میڈیا سے گفتگو میں دیں۔
بیرسٹر گوہر علی خان نے بتایا کہ اجلاس میں تمام رہنماؤں کو عمران خان کی جانب سے واضح پیغام دیا گیا کہ آپس کے جھگڑے ختم کر کے تحریک کو یکجہتی کے ساتھ آگے بڑھایا جائے۔ انہوں نے کہا:
"ہماری تمام توانائیاں عمران خان کی رہائی پر مرکوز ہیں، اور ہم تحریک کو 5 اگست تک عوامی سطح پر عروج پر لے جائیں گے۔”
پارلیمانی پارٹی نے جیل میں عمران خان کے ساتھ مبینہ ناروا سلوک پر گہری تشویش کا اظہار کیا اور مطالبہ کیا کہ انہیں فوری طور پر پارٹی قیادت اور قانونی ٹیم سے ملاقات کی اجازت دی جائے۔
دوسری جانب، پارٹی رہنما شیخ وقاص اکرم نے پیٹرولیم مصنوعات کی قیمتوں میں حالیہ اضافے کو سختی سے مسترد کرتے ہوئے کہا کہ:
"مہنگائی کے مارے عوام پر مزید بوجھ ڈالنا ناقابل قبول ہے، حکومت کو فوری طور پر قیمتیں واپس لینا ہوں گی۔”
اجلاس میں ملکی سیاسی و معاشی صورتحال کا تفصیلی جائزہ لیا گیا اور آئندہ حکمت عملی پر مشاورت کی گئی۔
