لاہور: وزیراعلیٰ پنجاب مریم نواز شریف نے کہا ہے کہ حکومت پنجاب کی جانب سے بغیر کسی سفارش اور سیاسی وابستگی کے عوام کو گھروں کی تعمیر کے لیے قرضوں کی فراہمی ایک قابلِ تقلید اور تاریخی قدم ہے۔
اپنے ایک بیان میں وزیراعلیٰ نے کہا کہ
"ہم نے عوام سے کیا گیا ایک اور وعدہ پورا کر دیا ہے۔”
انہوں نے کہا کہ "اپنی چھت، اپنا گھر” منصوبہ صرف ایک اسکیم نہیں بلکہ لاکھوں پاکستانیوں کے خوابوں کو حقیقت میں بدلنے کی عملی کوشش ہے۔ اس پراجیکٹ کے تحت تمام اہل افراد کو بلا تفریق اور شفاف طریقے سے قرضے جاری کیے جا رہے ہیں۔
مریم نواز نے فخر کے ساتھ کہا:
"ہم نے عوام کے لیے گھر بنانے کا ریکارڈ قائم کیا ہے اور انشاء اللہ اپنے ہی ریکارڈز توڑیں گے۔”
انہوں نے مزید کہا کہ قائد نواز شریف کا عوامی خدمت کا وژن آج عملی صورت اختیار کر چکا ہے۔
"کسی نے صرف نعرے لگائے، لیکن ہم نے زمین پر عوام کے لیے گھر تعمیر کیے ہیں۔”
تجزیہ کاروں کے مطابق یہ اقدام نہ صرف عوام کو باعزت رہائش فراہم کرنے کی جانب ایک بڑا قدم ہے بلکہ اس سے روزگار، معیشت اور تعمیراتی شعبے کو بھی فروغ ملے گا۔
