نادرا نے شناختی کارڈ گم یا ایکسپائر ہونے پر نیا کارڈ بنوانے کا آسان طریقہ بتا دیا

اسلام آباد: نیشنل ڈیٹا بیس رجسٹریشن اتھارٹی (نادرا) نے شہریوں کی سہولت کے لیے شناختی کارڈ کی مدت ختم ہونے یا گمشدگی کی صورت میں نیا کارڈ حاصل کرنے کا آسان اور کم لاگت طریقہ جاری کر دیا ہے۔

نادرا کی جانب سے جاری کردہ سوشل میڈیا پوسٹ میں بتایا گیا ہے کہ جن افراد کا بغیر چِپ والا شناختی کارڈ ختم ہو چکا ہے یا گم ہو گیا ہے، وہ روایتی طریقے سے "تجدید” یا "گمشدگی” کی درخواست دینے کے بجائے "ترمیم” (Modification) کی درخواست جمع کروائیں۔

یہ درخواست نادرا دفتر کے علاوہ پاک آئی ٹی موبائل ایپ کے ذریعے بھی دی جا سکتی ہے، جو نہ صرف وقت بچاتی ہے بلکہ کم لاگت میں اضافی اسمارٹ فیچرز والا نیا شناختی کارڈ حاصل کرنے کا بہترین ذریعہ ہے۔

🔹 کم فیس میں جدید اسمارٹ کارڈ:
نادرا حکام کے مطابق اس طریقے سے شہری کم فیس میں اسمارٹ کارڈ جیسی سہولیات سے فائدہ اٹھا سکتے ہیں، جس میں اضافی سیکیورٹی فیچرز، بہتر شناختی نظام، اور تیز تر پراسیسنگ شامل ہے۔

🔹 شناختی کارڈ فیس اور ڈیلیوری تفصیلات:
نارمل کارڈ: فیس 400 روپے، ڈیلیوری کا وقت 15 دن

ارجنٹ کارڈ: فیس 1,150 روپے، ڈیلیوری کا وقت 12 دن

ایگزیکٹو کارڈ: فیس 2,150 روپے، ڈیلیوری کا وقت 6 دن

نادرا کے اس اقدام کو عوامی حلقوں کی جانب سے سراہا جا رہا ہے، جو شناختی کارڈ کے اجرا کے عمل کو مزید آسان اور شفاف بنانے کی جانب ایک اہم قدم ہے۔