ریاض / دبئی: سعودی عرب اور دیگر خلیجی ممالک میں محرم الحرام 1447 ہجری کا چاند نظر آ گیا ہے، جس کے بعد نئے اسلامی سال کا آغاز بدھ، 26 جون 2025 سے ہو رہا ہے۔
نئے اسلامی سال کے آغاز کے ساتھ ہی دنیا بھر میں مسلمانوں نے روحانی تجدید، عزم، اور تاریخِ اسلام کے اہم واقعات کو یاد کرنے کا سلسلہ شروع کر دیا ہے۔
غلاف کعبہ کی تبدیلی کی روح پرور روایت
سعودی عرب میں نئے اسلامی سال کے موقع پر روایت کے مطابق کعبہ شریف کا غلاف (کسوہ) تبدیل کرنے کی روح پرور تقریب کا آغاز بھی کر دیا گیا ہے۔ یہ عمل اسلامی روایات میں انتہائی اہمیت کا حامل سمجھا جاتا ہے اور ہر سال یکم محرم کو انجام دیا جاتا ہے۔
عاشورہ 5 جولائی کو ہوگا
سعودی عرب میں یومِ عاشورہ 5 جولائی 2025 کو ہوگا، جب مسلمان حضرت امام حسینؓ اور شہدائے کربلا کو خراجِ عقیدت پیش کریں گے۔ یہ دن صبر، قربانی، اور حق کے لیے استقامت کی علامت ہے۔
خلیجی ممالک میں تقریبات اور مذہبی اجتماعات
متحدہ عرب امارات، قطر، بحرین، کویت اور دیگر عرب ممالک میں نئے اسلامی سال کے آغاز پر مذہبی تقاریب، دعائیہ اجتماعات اور روحانی محافل کا اہتمام کیا گیا ہے۔ مساجد کو خصوصی طور پر سجایا گیا ہے اور علما کرام نے اسلامی سال کی فضیلت اور محرم الحرام کی اہمیت پر خطابات بھی کیے۔
پاکستان میں چاند نظر آنے کا امکان
ادھر پاکستان میں بھی 26 جون کو محرم الحرام کا چاند نظر آنے کا قوی امکان ہے، جس کے بعد جمعرات، 27 جون کو یکم محرم الحرام ہونے کی توقع ہے۔
محرم: تاریخ، قربانی اور عزتِ دین کا مہینہ
محرم الحرام کو اسلامی تقویم میں انتہائی محترم اور باوقار مہینے کی حیثیت حاصل ہے۔ یہی مہینہ ہے جس میں:
حضرت عمر فاروقؓ کی شہادت کا دن آتا ہے۔
واقعہ کربلا رونما ہوا، جس میں نواسۂ رسول ﷺ حضرت امام حسینؓ نے دینِ اسلام کی بقا کے لیے عظیم قربانی پیش کی۔
