نیویارک: اقوام متحدہ کے سیکرٹری جنرل انتونیو گوتریس نے ایران کی ایٹمی تنصیبات پر امریکی حملے کو مشرقِ وسطیٰ میں کشیدگی میں خطرناک اور ناپسندیدہ اضافہ قرار دیتے ہوئے عالمی برادری کو خبردار کیا ہے کہ صورتحال تیزی سے قابو سے باہر ہو سکتی ہے۔
ایک بیان میں گوتریس نے کہا کہ "اس بات کا خطرہ بڑھتا جا رہا ہے کہ موجودہ تنازع جلد ایک بڑی اور بے قابو جنگ میں تبدیل ہو سکتا ہے، جو نہ صرف ایران اور امریکا بلکہ پورے خطے اور دنیا کے امن و استحکام کے لیے شدید خطرہ بن سکتی ہے۔”
"افراتفری کی لہر سے بچنا ہوگا”
سیکرٹری جنرل نے مزید کہا:
"یہ لمحہ انتہائی خطرناک ہے۔ ہمیں فوری طور پر ایسے اقدامات سے گریز کرنا ہوگا جو افراتفری کو جنم دے سکتے ہیں۔ عام شہریوں کی جانیں داؤ پر ہیں، اور کسی بھی نئی جنگ کے نتائج تباہ کن ہوں گے۔”
سفارت کاری ہی واحد راستہ
انتونیو گوتریس نے واضح الفاظ میں کہا کہ
"تنازع کا کوئی فوجی حل موجود نہیں۔ موجودہ صورتحال کو صرف اور صرف سفارت کاری، بات چیت اور بین الاقوامی تعاون کے ذریعے ہی قابو میں لایا جا سکتا ہے۔ واحد امید، واحد راستہ — امن ہے۔”
عالمی برادری سے اپیل
اقوام متحدہ کے سربراہ نے عالمی قوتوں اور علاقائی ممالک پر زور دیا کہ وہ بردباری، تحمل اور تعمیری مکالمے کے ذریعے صورتحال کو بگڑنے سے روکیں۔ انہوں نے کہا کہ اقوام متحدہ تنازع کو پرامن طریقے سے حل کرنے کے لیے ہر ممکن کردار ادا کرنے کو تیار ہے۔
