اسلام آباد – پاکستان مسلم لیگ (ن) کے صدر اور سابق وزیراعظم نواز شریف آج (بدھ) کو دو ہفتے کے دورہ برطانیہ کے بعد وطن واپس پہنچ رہے ہیں۔ ان کا دورہ لندن طبی معائنوں کے سلسلے میں تھا، جس دوران انہوں نے مختلف سیاسی و قومی امور پر بھی گفتگو کی۔
شہباز شریف کی حکومت کی کارکردگی کو سراہا
لندن میں اپنے اعزاز میں دیے گئے ظہرانے سے خطاب کرتے ہوئے نواز شریف نے کہا:
"وزیراعظم شہباز شریف کی قیادت میں موجودہ حکومت بہترین کام کر رہی ہے۔ ہم دونوں میں کوئی فرق نہیں، ہم ایک ہیں، اور پاکستان کے لیے ایک ہی وژن رکھتے ہیں۔”
ایران-اسرائیل کشیدگی پر دوٹوک مؤقف
نواز شریف نے ایران اور اسرائیل کے درمیان حالیہ کشیدگی پر گفتگو کرتے ہوئے کہا کہ:
"ایران محض ہمارا ہمسایہ نہیں، بلکہ ایک برادر اسلامی ملک ہے جس کے ساتھ ہمارے گہرے مذہبی و ثقافتی تعلقات ہیں۔”
انہوں نے حکومتِ پاکستان کے ایران کے حوالے سے اصولی مؤقف کی حمایت کرتے ہوئے کہا کہ ملک کو خطے میں امن، بھائی چارے اور خودمختاری کے اصول پر کاربند رہنا چاہیے۔
بھارت کے خلاف مؤثر دفاع، قومی اتحاد کی طاقت
نواز شریف نے بھارت کی حالیہ جارحیت پر تبصرہ کرتے ہوئے کہا:
"پاکستان نے بھارتی جارحیت کا منہ توڑ جواب دیا۔ بھارت کی جھوٹی انا کو شکست ہوئی اور ان کی قیادت کو اندرونِ ملک شرمندگی کا سامنا کرنا پڑا۔ یہ سب ہماری مضبوط فوج اور قوم کے اتحاد کی بدولت ممکن ہوا۔”
انہوں نے اس موقع پر یہ بھی واضح کیا کہ:
"ہماری عسکری صلاحیت دفاع کے لیے ہے، حملے کے لیے نہیں۔ ہم امن چاہتے ہیں، لیکن قومی وقار پر سمجھوتہ نہیں کریں گے۔”
اوورسیز پاکستانیوں کا شکریہ، اتحاد پر زور
نواز شریف نے بیرونِ ملک مقیم مسلم لیگی کارکنان کا خصوصی شکریہ ادا کرتے ہوئے انہیں پارٹی کا قیمتی اثاثہ قرار دیا۔ انہوں نے موجودہ ملکی و بین الاقوامی حالات میں قومی
یکجہتی، استحکام اور سیاسی برداشت کی ضرورت پر زور دیا۔
