واشنگٹن ڈی سی – پاکستان اور امریکہ کے تعلقات میں ایک نئی اور غیرمعمولی پیشرفت متوقع ہے۔ وائٹ ہاؤس اور پاکستان کے اعلیٰ سیکیورٹی ذرائع نے تصدیق کی ہے کہ پاک فوج کے سربراہ، فیلڈ مارشل جنرل عاصم منیر، اور امریکی صدر ڈونلڈ ٹرمپ کے درمیان آج ایک اہم ملاقات متوقع ہے۔
وائٹ ہاؤس کے مطابق یہ ملاقات ظہرانے پر کیبنٹ روم میں ہوگی، جس میں صحافیوں کو شرکت کی اجازت نہیں دی گئی۔ تاہم، توقع کی جا رہی ہے کہ صدر ٹرمپ ملاقات کے بعد میڈیا یا سوشل میڈیا پر اس بارے میں کوئی بیان جاری کریں گے۔
یہ ملاقات ایسے وقت میں ہو رہی ہے جب صدر ٹرمپ اپنا کینیڈا کا دورہ مشرق وسطیٰ کی بدلتی صورتحال کے پیش نظر مختصر کر کے وطن واپس لوٹے ہیں، اور بھارتی وزیراعظم سے ان کی متوقع ملاقات ملتوی ہو چکی ہے۔ اس تناظر میں یہ ملاقات خطے میں طاقت کے توازن اور سفارتی تعلقات کے حوالے سے نہایت اہمیت کی حامل سمجھی جا رہی ہے۔
اس سے قبل جنرل عاصم منیر نے واشنگٹن ڈی سی میں پاکستانی نژاد امریکیوں سے خطاب کیا، جس میں انہوں نے صدر ٹرمپ کی جانب سے مسئلہ کشمیر کو اجاگر کرنے کی کوششوں کو سراہا۔ انہوں نے کہا کہ آنے والے دنوں میں کئی اہم پیشرفتیں متوقع ہیں۔
ایک اہم انکشاف میں، جنرل عاصم منیر نے یہ بھی بتایا کہ امریکا یوکرین کے ساتھ معدنی وسائل کا 400 سے 500 ارب ڈالر مالیت کا معاہدہ کرنے کا خواہاں ہے، جبکہ پاکستان کے پاس ایک کھرب ڈالر مالیت کے معدنی ذخائر موجود ہیں۔ جنرل عاصم منیر نے امریکا کو پیشکش کی کہ اگر وہ پاکستان میں ان ذخائر پر سرمایہ کاری کرے تو ہر سال 10 سے 15 ارب ڈالر کا فائدہ حاصل کر سکتا ہے، اور یہ معاشی شراکت داری آئندہ 100 برسوں تک جاری رہ سکتی ہے۔
پاکستان کی جانب سے زور دیا گیا ہے کہ معدنیات کی پروسیسنگ پاکستان میں ہی کی جائے، تاکہ مقامی سطح پر روزگار کے مواقع پیدا ہوں اور صنعتی ترقی کو فروغ ملے۔
یہ ملاقات نہ صرف دونوں ممالک کے تعلقات میں ایک نیا باب کھولنے جا رہی ہے بلکہ اس کے خطے اور عالمی سیاست پر بھی دیرپا اثرات مرتب ہونے کے امکانات ہیں۔
