اسلام آباد: صدر مملکت آصف علی زرداری نے چائلڈ لیبر کے خلاف عالمی دن کے موقع پر بچوں کے حقوق کے تحفظ کے عزم کا اعادہ کرتے ہوئے کہا ہے کہ کسی بچے کو غربت کے باعث مزدوری پر مجبور نہیں ہونا چاہیے۔
صدر مملکت نے اپنے پیغام میں کہا کہ یہ دن ہمیں یاد دلاتا ہے کہ بچوں کو مشقت سے بچانا ہماری مشترکہ ذمہ داری ہے۔ انہوں نے کہا کہ چائلڈ لیبر ایک عالمی چیلنج ہے جس سے نمٹنے کے لیے تمام اسٹیک ہولڈرز کو مل کر مؤثر اقدامات کرنا ہوں گے۔
✅ قانونی اور فلاحی اقدامات پر روشنی
صدر آصف علی زرداری نے کہا کہ پاکستان نے چائلڈ لیبر اور بچوں کے استحصال کے خلاف قوانین منظور کیے ہیں اور متاثرہ بچوں کی دیکھ بھال اور بحالی کے لیے سروس یونٹس اور ادارے قائم کیے گئے ہیں۔ انہوں نے زور دیا کہ آجران چائلڈ لیبر قوانین پر سختی سے عملدرآمد کو یقینی بنائیں۔
🎓 تعلیم اور شعور کی ضرورت
انہوں نے والدین پر زور دیا کہ وہ بچوں کی تعلیم کو ترجیح دیں، جبکہ اساتذہ اور اسکولز سے کہا کہ ایسے بچوں کی شناخت کریں جو اسکول چھوڑنے پر مجبور ہیں۔ صدر نے میڈیا سے اپیل کی کہ چائلڈ لیبر کے خلاف شعور بیدار کرنے میں اپنا مؤثر کردار ادا کرے۔
🌍 عالمی برادری سے انسانی ہمدردی کی اپیل
صدر زرداری نے عالمی برادری کی توجہ غزہ کے بچوں کی حالتِ زار کی طرف مبذول کراتے ہوئے کہا کہ ہزاروں معصوم بچے جنگ، جارحیت اور تشدد کے سبب بے گھر، زخمی اور یتیم ہو چکے ہیں۔
"ان بچوں کو فوری عالمی مدد، تحفظ اور انصاف کی ضرورت ہے،” انہوں نے زور دیا۔
