جکارتہ / بیجنگ — پاکستان کی شاندار فضائی کارکردگی عالمی سطح پر توجہ حاصل کر رہی ہے، جہاں حالیہ پاک-بھارت کشیدگی کے دوران چینی ساختہ J-10C طیاروں کی مؤثر کارکردگی نے انڈونیشیا جیسے اہم ملک کو بھی متاثر کیا ہے۔
انڈونیشیا کے نائب وزیر دفاع ڈونی ایرماوان نے بین الاقوامی میڈیا سے بات کرتے ہوئے تصدیق کی ہے کہ ان کا ملک چین سے J-10C لڑاکا طیاروں کی خریداری پر سنجیدگی سے غور کر رہا ہے، اور اس فیصلے میں پاکستان کی کامیاب فضائی حکمت عملی کلیدی کردار ادا کر رہی ہے۔
ڈونی ایرماوان کا کہنا تھا، "ہم پاکستان کے تجربے کو اہم سمجھتے ہیں اور J-10C طیاروں کی صلاحیتوں کا جائزہ لینے کے لیے ان کے نتائج کو قریب سے دیکھ رہے ہیں۔”
انہوں نے مزید بتایا کہ چین نے صرف طیارے ہی نہیں بلکہ دیگر دفاعی ساز و سامان جیسے بحری جہاز اور جدید ہتھیار بھی فراہم کرنے کی پیشکش کی ہے۔
انڈونیشیا فی الوقت امریکی F-15 اور فرانسیسی رافیل طیاروں کے آپشنز پر بھی غور کر رہا ہے، تاہم چینی J-10C کی مؤثر اور کم لاگت صلاحیتوں نے اس کو ایک مضبوط امیدوار بنا دیا ہے۔
یاد رہے کہ حالیہ کشیدگی میں پاکستان نے J-10C طیاروں کی مدد سے بھارتی فضائیہ کے 5 جنگی طیارے مار گرائے تھے، جن میں 3 رافیل طیارے بھی شامل تھے — اس غیر معمولی کامیابی نے دفاعی ماہرین کو حیران کر دیا۔
یہ پیش رفت نہ صرف پاکستان کی دفاعی صلاحیتوں کی عالمی سطح پر پذیرائی ہے، بلکہ علاقائی توازن اور اسٹریٹیجک شراکت داریوں میں پاکستان کے کردار کو مزید مستحکم کرتی ہے۔
