لندن — برطانیہ میں جاری شدید گرمی کی لہر کے دوران جہاں درجہ حرارت ریکارڈ سطح تک پہنچا، وہیں ماحولیاتی ماہرین نے اطمینان دلایا ہے کہ موسم میں متوقع تبدیلی خشک سالی کے خدشات کو کم کر سکتی ہے۔
مئی کے آغاز میں ریکارڈ درجہ حرارت 29.3 سینٹی گریڈ تک پہنچا، جس نے شہریوں کو گرمی کا غیر معمولی احساس دلایا۔ ماحولیاتی ایجنسی نے خبردار کیا تھا کہ اگر بارش نہ ہوئی تو ملک کے بعض حصے درمیانے درجے کی خشک سالی سے دوچار ہو سکتے ہیں۔
تاہم، اچھی خبر یہ ہے کہ ہفتے کے اختتام تک بحراوقیانوس سے ایک نیا کم دباؤ داخل ہونے کی توقع ہے، جو برطانیہ کے مغربی علاقوں میں بارش کا باعث بن سکتا ہے۔ ابتدائی پیش گوئیوں کے مطابق، مغربی اور شمالی علاقوں میں ہلکی بارشیں ہوں گی، جب کہ شمال مغربی اسکاٹ لینڈ میں تیز ہواؤں کے ساتھ درجہ حرارت میں بھی کمی واقع ہوگی۔
ماہرین کا کہنا ہے کہ تیز ہواؤں اور بارش کے اس نئے سلسلے سے درجہ حرارت 20 سے 22 سینٹی گریڈ کے درمیان رہنے کی توقع ہے، جو گرمی کے موجودہ دباؤ میں واضح کمی لا سکتا ہے۔
محکمہ موسمیات کے مطابق، اگر یہ بارشیں متوقع مقدار میں ہوئیں تو نہ صرف درجہ حرارت میں کمی آئے گی بلکہ زیر زمین پانی کے ذخائر پر بھی مثبت اثر پڑے گا، جو خشک سالی کے خطرے کو کم کرنے میں مددگار ہوگا۔
ماحولیاتی ماہرین نے عوام کو مشورہ دیا ہے کہ پانی کے استعمال میں احتیاط جاری رکھیں، لیکن موسم کی مثبت تبدیلیوں سے امید پیدا ہوئی ہے کہ آنے والے دنوں میں صورتحال بہتر ہو سکتی ہے۔
