قوم متحد، افواجِ پاکستان سرخرو: دنیا کی کوئی طاقت پاکستان کو نقصان نہیں پہنچا سکتی، وزیراعلیٰ سندھ

کراچی: وزیراعلیٰ سندھ سید مراد علی شاہ نے کہا ہے کہ پاکستان ایک مضبوط اور متحد قوم ہے، اور دنیا کی کوئی طاقت اسے نقصان نہیں پہنچا سکتی۔ ان خیالات کا اظہار انہوں نے سندھ کابینہ کے اہم اجلاس کی صدارت کرتے ہوئے کیا، جس میں صوبائی وزراء، مشیران، معاونینِ خصوصی اور چیف سیکریٹری سمیت اعلیٰ حکام شریک ہوئے۔

اجلاس میں سندھ کابینہ نے پاک فوج، پاک فضائیہ اور پاک بحریہ کو بھرپور خراجِ تحسین پیش کرتے ہوئے ان کی جرات مندی، قربانی اور دفاع وطن کے جذبے کو سراہا۔

وزیراعلیٰ سندھ نے کہا:
"جس طرح ہماری افواج نے بھارتی جارحیت کا منہ توڑ جواب دیا، اس کی مثال نہیں ملتی۔ پوری قوم نے یکجہتی اور اتحاد کا مظاہرہ کر کے دشمن کے عزائم خاک میں ملا دیے۔”

انہوں نے سیاسی جماعتوں اور عوامی سطح پر موجود اتحاد کو پاکستان کی اصل طاقت قرار دیا اور اس اتحاد کو مزید فروغ دینے پر زور دیا۔
"ملک کی یکجہتی کو ہماری سب سے بڑی طاقت بنانا ہوگا تاکہ ہر سازش کا منہ توڑ جواب دیا جا سکے،” انہوں نے کہا۔

اجلاس میں 10 اہم حکومتی نکات پر تفصیلی غور کیا گیا، جبکہ مزید 10 اضافی نکات پر بھی فیصلے متوقع ہیں۔ ساتھ ہی گزشتہ کابینہ اجلاس کے منٹس کی بھی منظوری دی گئی۔

سیاسی و عوامی حلقے وزیراعلیٰ سندھ کے اس عزم کو ملک کی سالمیت اور قومی وحدت کے لیے حوصلہ افزا پیغام قرار دے رہے ہیں، جو اس وقت کی قومی ضرورت بھی ہے۔