اسلام آباد: پاکستان اور عالمی مالیاتی فنڈ (آئی ایم ایف) کے درمیان آئندہ مالی سال 2025-26 کے بجٹ کے لیے مذاکرات میں مثبت پیش رفت سامنے آئی ہے۔ ملک کی معیشت کو مضبوط بنانے اور ٹیکس نیٹ کو وسعت دینے کے لیے 700 ارب روپے کی اضافی محصولات حاصل کرنے پر مختلف متبادل اقدامات زیرِ غور ہیں۔
حکومت نے آئی ایم ایف سے تنخواہ دار طبقے، تمباکو اور مشروبات کے شعبوں میں ٹیکس نظام میں اصلاحات پر بات چیت کی ہے، جس کا مقصد بوجھ کو منصفانہ بناتے ہوئے معیشت کو مزید شفاف اور مستحکم بنانا ہے۔ تنخواہ دار متوسط طبقے پر غیر ضروری بوجھ ڈالنے کے بجائے متوازن پالیسی بنانے کی کوشش کی جا رہی ہے، جبکہ غیرقانونی سگریٹ برانڈز کے خلاف کریک ڈاؤن بھی زیر غور ہے تاکہ قانونی صنعت کو تحفظ دیا جا سکے اور صحت کے شعبے کو فائدہ ہو۔
تمباکو کی صنعت میں کم از کم قانونی قیمت (MLP) بڑھانے کی تجویز بھی زیرِ غور ہے تاکہ غیر قانونی سگریٹ کی فروخت روکی جا سکے، جو نہ صرف صحت کے لیے خطرہ ہیں بلکہ سالانہ 300 ارب روپے کے ممکنہ نقصان کا باعث بنتے ہیں۔ حکومت صحت کے تحفظ اور نوجوانوں میں تمباکو نوشی کے بڑھتے رجحان پر قابو پانے کے لیے عملی اقدامات کر رہی ہے۔
اسی طرح، مشروبات کے شعبے میں ٹیکس پالیسی پر جاری مشاورت کا مقصد ایسا نظام بنانا ہے جو معیشت کی بہتری اور شفافیت کو یقینی بنائے، جبکہ غیر ضروری ریفنڈز سے بچا جا سکے۔
آئی ایم ایف اور حکومت کے درمیان جاری بات چیت سے یہ واضح ہوتا ہے کہ پاکستان ایک مالی طور پر ذمہ دار اور شفاف معیشت کی طرف گامزن ہے۔ ایف بی آر کے لیے 14307 ارب روپے کا ٹیکس ہدف تجویز کیا گیا ہے، جبکہ مختلف اداروں کے درمیان تخمینوں میں موجود فرق کو مفاہمت کے ذریعے حل کرنے کی کوشش جاری ہے۔
خوش آئند بات یہ ہے کہ اپریل کے مہینے میں پاکستان کا کرنٹ اکاؤنٹ سرپلس رہا، جو کہ ملکی معیشت کے لیے ایک مثبت اشارہ ہے۔ اسٹیٹ بینک کے مطابق اپریل میں 17 ملین ڈالر کا کرنٹ اکاؤنٹ سرپلس ریکارڈ کیا گیا، جو معاشی استحکام کی جانب ایک اور قدم ہے۔
ملکی معیشت میں بہتری کی یہ کوششیں نہ صرف پاکستان کے عالمی اعتماد میں اضافے کا باعث بنیں گی بلکہ عوام کے لیے ایک بہتر مالی مستقبل کی نوید بھی ثابت ہو سکتی ہیں۔
