روس اور یوکرین کے درمیان عارضی جنگ بندی کا آغاز، 10 مئی تک جاری رہے گی

ماسکو/کیف (بین الاقوامی خبر رساں ادارے) – روس اور یوکرین کے درمیان جاری تنازع میں ایک مثبت پیشرفت سامنے آئی ہے، جہاں دونوں ممالک کے درمیان عارضی جنگ بندی کا آغاز آج سے ہو گیا ہے۔ یہ جنگ بندی 10 مئی کی نصف شب تک جاری رہے گی۔

روسی وزارت خارجہ کے مطابق، اس جنگ بندی کا مقصد کشیدگی میں کمی اور طویل المدتی امن کی راہ ہموار کرنا ہے۔ ترجمان نے کہا کہ یہ جنگ بندی یوکرین کے رویے کی آزمائش بھی ہوگی تاکہ مستقبل میں کسی مستقل معاہدے کی بنیاد رکھی جا سکے۔

یاد رہے کہ روس نے اس سے قبل بھی 19 اپریل کو ایسٹر کے موقع پر جنگ بندی کا اعلان کیا تھا، جس کا مقصد مذہبی تہوار کے احترام میں انسانی ہمدردی کا اظہار تھا۔

روسی صدارتی ترجمان دیمتری پیسکوف نے خبردار کیا ہے کہ اگر یوکرین نے اس جنگ بندی کی خلاف ورزی کی، تو روس متناسب اور سخت ردعمل دے گا۔

دونوں ممالک کے عوام اور عالمی برادری کی نظریں اب اس جنگ بندی کے دوران کی صورتحال پر مرکوز ہیں، جو کسی ممکنہ امن معاہدے کی ابتدائی بنیاد ثابت ہو سکتی ہے۔