وزیر اعظم شہباز شریف کی زیر صدارت نیشنل سیکیورٹی کمیٹی کا اہم اجلاس آج طلب – دفاعی اقدامات اور ملکی سلامتی پر اہم فیصلے متوقع

اسلام آباد
وزیر اعظم پاکستان محمد شہباز شریف نے بھارت کی حالیہ جارحیت کے پیش نظر نیشنل سیکیورٹی کمیٹی کا اہم اجلاس آج صبح 10 بجے طلب کر لیا ہے۔ اجلاس میں ملک کی مجموعی سیکیورٹی صورتحال، دفاعی حکمت عملی، اور مستقبل کے لائحہ عمل پر غور کیا جائے گا۔

وفاقی وزیر اطلاعات نے اجلاس کی تصدیق کرتے ہوئے کہا کہ یہ مشاورتی نشست قومی سلامتی کے لیے نہایت اہمیت کی حامل ہے، جس میں بھارت کی جانب سے کی گئی حالیہ خلاف ورزیوں اور اس کے ممکنہ نتائج کا تفصیلی جائزہ لیا جائے گا۔

ذرائع کے مطابق اجلاس میں اعلیٰ عسکری قیادت، وفاقی وزراء، سیکیورٹی اداروں کے نمائندگان اور دیگر متعلقہ حکام شریک ہوں گے۔ اجلاس میں مسلح افواج کی تیاری، موجودہ دفاعی پالیسیوں اور ممکنہ خطرات سے نمٹنے کے لیے فوری و مؤثر اقدامات زیرِ غور آئیں گے۔

وفاقی وزیر اطلاعات نے مزید کہا کہ اجلاس کے بعد وزیراعظم شہباز شریف قوم کو اعتماد میں لیں گے اور موجودہ سیکیورٹی صورتحال کے تناظر میں حکومت کی حکمتِ عملی اور فیصلوں سے آگاہ کریں گے۔

انہوں نے اس بات پر زور دیا کہ پاکستان اپنی خودمختاری، سالمیت اور شہریوں کے تحفظ پر کسی قسم کا سمجھوتہ نہیں کرے گا، اور ہر محاذ پر دشمن کو بھرپور جواب دیا جائے گا۔