ماسکو: 6 مئی 2025
روس نے پاکستان اور بھارت کے درمیان حالیہ سرحدی کشیدگی پر گہری تشویش کا اظہار کیا ہے۔ روسی صدر ولادیمیر پیوٹن کے ترجمان دمتری پیسکوف نے ماسکو میں میڈیا سے گفتگو کرتے ہوئے کہا کہ روس پاک بھارت سرحد پر بڑھتی ہوئی کشیدگی کو انتہائی سنجیدگی سے دیکھ رہا ہے۔
پیسکوف نے کہا،
"ہم صورتحال پر گہری نظر رکھے ہوئے ہیں اور دونوں ممالک کے ساتھ اپنے دوستانہ تعلقات کو انتہائی اہمیت دیتے ہیں۔”
روسی ترجمان نے اس بات پر زور دیا کہ خطے میں امن و استحکام کے لیے پاکستان اور بھارت کو تحمل، بات چیت اور سفارتی ذرائع کا استعمال کرنا چاہیے۔ انہوں نے کہا کہ روس ہمیشہ سے اس خطے میں کشیدگی کے خاتمے اور تعمیری مکالمے کا حامی رہا ہے۔
ماہرین کا کہنا ہے کہ روس کی جانب سے یہ بیان عالمی برادری کی اس بڑھتی ہوئی تشویش کا عکاس ہے جو جنوبی ایشیا میں ممکنہ تنازع کی صورت میں عالمی امن پر اثرانداز ہو سکتی ہے۔
روس کا یہ مؤقف نہ صرف پاکستان اور بھارت دونوں کے ساتھ اس کے متوازن تعلقات کو ظاہر کرتا ہے، بلکہ عالمی امن کے لیے اس کی ذمے دارانہ سفارتی سوچ کی عکاسی بھی کرتا ہے۔
