واشنگٹن: 6 مئی 2025
امریکی صدر ڈونلڈ ٹرمپ کی انتظامیہ نے اعلیٰ تعلیم کے شعبے میں ایک بڑا اور غیر معمولی اقدام اٹھاتے ہوئے ہارورڈ یونیورسٹی کی وفاقی امداد منجمد کر دی ہے۔ غیر ملکی خبر رساں ایجنسیوں کے مطابق، امریکی محکمہ تعلیم نے ہارورڈ کو اس فیصلے سے باضابطہ طور پر آگاہ کر دیا ہے۔
رپورٹس کے مطابق، تحقیق اور دیگر تعلیمی سرگرمیوں کے لیے دی جانے والی اربوں ڈالر کی امداد روکی گئی ہے۔ محکمہ تعلیم کا کہنا ہے کہ اگر ٹرمپ انتظامیہ کے مطالبات پر عملدرآمد نہ کیا گیا تو یہ مالی تعاون غیر معینہ مدت تک معطل رہے گا۔
یاد رہے کہ ٹرمپ انتظامیہ نے مارچ میں اعلان کیا تھا کہ وہ ہارورڈ یونیورسٹی کے 256 ملین ڈالر کے موجودہ وفاقی معاہدوں اور مزید 8.7 ارب ڈالر کی متوقع گرانٹس کا تفصیلی جائزہ لے رہی ہے۔ یہ اقدام اس وقت سامنے آیا جب انتظامیہ نے الزام عائد کیا کہ یونیورسٹی نے کیمپس میں بڑھتے ہوئے یہود مخالف رویے کے تدارک کے لیے خاطر خواہ اقدامات نہیں کیے۔
حکومتی دباؤ کے باوجود ہارورڈ نے اپنے تعلیمی اور انتظامی خودمختاری پر اصرار کیا، جس پر کشیدگی میں اضافہ ہوا۔ یونیورسٹی نے دیگر اداروں کے برعکس، حکومتی مداخلت کو قبول کرنے سے انکار کر دیا، جس کے نتیجے میں وفاقی امداد منجمد کر دی گئی۔
ماہرین تعلیم اور سیاسی تجزیہ کار اس فیصلے کو امریکی تعلیمی اداروں کی خودمختاری پر ایک ممکنہ ضرب قرار دے رہے ہیں، جبکہ بعض حلقے اسے انتظامیہ کی جانب سے جوابدہی کے مطالبے کا حصہ قرار دیتے ہیں۔
فی الوقت ہارورڈ یونیورسٹی کی جانب سے باضابطہ ردعمل سامنے نہیں آیا، تاہم اس پیش رفت نے اعلیٰ تعلیمی اداروں اور حکومتی پالیسیوں کے درمیان تعلقات پر کئی سوالات اٹھا دیے ہیں۔
