لاہور: وزیراعلیٰ پنجاب مریم نواز نے لاہور شہر کی ترقی کے لیے اہم قدم اٹھاتے ہوئے لاہور ڈیولپمنٹ پلان کے لیے ماہانہ ٹائم لائن مقرر کرنے کی ہدایت جاری کر دی ہے، تاکہ منصوبوں کی بروقت تکمیل کو یقینی بنایا جا سکے۔
یہ ہدایات انہوں نے نیدرلینڈز کی سفیر ہینی ڈی ویریس سے ملاقات کے موقع پر جاری کیں، جس دوران دو طرفہ تعلقات، سرمایہ کاری اور تجارتی حجم پر بھی گفتگو ہوئی۔ مریم نواز نے کہا کہ پاکستان اور نیدرلینڈز کے درمیان 2.3 ارب ڈالر کا تجارتی حجم ایک خوش آئند پیش رفت ہے۔
ملاقات کے بعد وزیراعلیٰ نے سینئر وزیر اور چیف سیکرٹری کو منصوبے کی بروقت تکمیل کا ٹاسک سونپا اور مختلف ترقیاتی پروجیکٹس کا تصویری معائنہ بھی کیا۔
اس موقع پر مریم نواز کا کہنا تھا کہ:
"ترقیاتی اسکیموں کی تکمیل میں تاخیر عوام کی روزمرہ زندگی کو متاثر کرتی ہے۔ منصوبوں پر تیزرفتار اور معیاری کام حکومت کی اولین ترجیح ہے۔”
ماہانہ بنیادوں پر ٹائم لائن مقرر کرنے سے نہ صرف منصوبوں پر بہتر نگرانی ممکن ہوگی بلکہ لاہور شہر کی بنیادی ڈھانچے، ٹرانسپورٹ اور شہری سہولیات میں بھی واضح بہتری آئے گی۔
