وفاقی وزیرِ اطلاعات عطا اللّٰہ تارڑ کا عمران خان اور بشریٰ بی بی پر الزام، پی ٹی آئی کی سیاست پر تنقید

وفاقی وزیرِ اطلاعات عطا اللّٰہ تارڑ نے لاہور میں میڈیا سے گفتگو کے دوران بانیٔ پی ٹی آئی عمران خان اور ان کی اہلیہ بشریٰ بی بی پر سنگین الزامات عائد کیے ہیں۔ انہوں نے کہا کہ ایک برطانوی جریدے کی اسٹوری میں یہ بات سامنے آئی کہ عمران خان کی تمام اہم فیصلے بشریٰ بی بی کی مشاورت سے کیے جاتے تھے، اور یہ فیصلے کسی ماہر یا ایکسپرٹ سے نہیں بلکہ بشریٰ بی بی سے پوچھ کر کیے جاتے تھے۔
عطا اللّٰہ تارڑ کا کہنا تھا کہ "دنیا کے جریدے کہہ رہے ہیں کہ تمام فیصلے ایک خاتون کرواتی تھیں، بانی پی ٹی آئی کے جتنے فیصلے تھے وہ روحانیت کے لبادے میں بشریٰ بی بی کرتی تھیں۔” انہوں نے مزید کہا کہ "تمام معاشی اور سیاسی فیصلے بشریٰ بی بی کے کہنے پر کیے جاتے تھے، اور اس دوران بانی پی ٹی آئی کی سیاست جھوٹ، منافقت اور بہتان کے سوا کچھ نہیں تھی۔”
وزیرِ اطلاعات نے یہ بھی کہا کہ عمران خان نے سابق وزیرِ اعلیٰ پنجاب شہباز شریف پر جھوٹے الزامات عائد کیے تھے، جن کا جواب شہباز شریف نے عدالت میں جا کر دیا۔ ان کا کہنا تھا کہ "بانیٔ پی ٹی آئی نے مختلف فورمز پر شہباز شریف پر الزامات دہرائے، اور اب دنیا کے جریدے کہہ رہے ہیں کہ بانی کے فیصلوں کے پیچھے جھوٹ اور بہتان کا نظام تھا۔”
عطا اللّٰہ تارڑ نے پی ٹی آئی کے 2017ء کے دھرنوں کو بھی تنقید کا نشانہ بناتے ہوئے کہا کہ پی ٹی آئی نے اس دوران بھی جھوٹے الزامات لگائے تھے اور ان کے پاس الزام تراشی کے سوا کچھ نہیں ہے۔
دوسری جانب، وزیرِ اطلاعات نے وانا کیڈٹ کالج کے سانحے کو اے پی ایس سے بڑا سانحہ قرار دیا، لیکن مسلح افواج اور دیگر فورسز کے کردار کو سراہتے ہوئے کہا کہ ان کی کارروائی کی بدولت سانحہ بڑا ہونے سے بچا۔ انہوں نے مزید بتایا کہ اسلام آباد کچہری دھماکے کے ملزمان کو پکڑ لیا گیا ہے اور کہا کہ "اِنشا اللّٰہ ملک میں امن ضرور آئے گا۔”