واشنگٹن: امریکی صدر ڈونلڈ ٹرمپ نے ایران کے موجودہ نظامِ حکومت پر سخت تنقید کرتے ہوئے ممکنہ "رجیم چینج” (نظام حکومت کی تبدیلی) کی جانب اشارہ دیا ہے۔ ان کا کہنا ہے کہ اگر موجودہ ایرانی حکومت ملک کو عظمت نہیں دے سکتی، تو پھر تبدیلی ناگزیر ہو سکتی ہے۔
صدر ٹرمپ نے اپنے سوشل میڈیا پلیٹ فارم "ٹروتھ سوشل” پر ایک پیغام میں کہا:
"رجیم چینج کی اصطلاح سیاسی طور پر درست نہیں سمجھی جاتی، لیکن اگر موجودہ ایرانی حکومت ایران کو عظیم نہیں بنا سکتی، تو پھر رجیم چینج کیوں نہیں؟”
یہ بیان ایسے وقت میں سامنے آیا ہے جب امریکا اور ایران کے درمیان کشیدگی میں اضافہ دیکھنے میں آ رہا ہے، اور خطے کی مجموعی سلامتی کے حوالے سے عالمی سطح پر تشویش پائی جاتی ہے۔
صدر ٹرمپ نے اپنے پیغام میں امریکی فوجی کارروائی کو "شاندار کامیابی” قرار دیتے ہوئے کہا کہ میزوری میں B-2 بمبار طیارے محفوظ طریقے سے واپس لینڈ کر چکے ہیں، جو امریکا کی دفاعی تیاری اور کامیابی کا مظہر ہے۔
انہوں نے مزید کہا:
"ہم نے بم کو ایران کے ہاتھ سے چھین لیا۔ اگر انہیں موقع ملتا، تو وہ اسے ضرور استعمال کرتے۔ ہماری فوج نے اس آپریشن میں بہادری اور ذہانت کا شاندار مظاہرہ کیا۔”
سیاسی تجزیہ کاروں کے مطابق صدر ٹرمپ کا بیان خطے میں نئی سفارتی و سیکیورٹی بحث کو جنم دے سکتا ہے، اور ممکن ہے کہ اس پر ایران کی جانب سے سخت ردعمل سامنے آئے۔
