نیپرا نے کے الیکٹرک کو 7 سالہ ٹیرف کی منظوری دے دی
اسلام آباد: نیشنل الیکٹرک پاور ریگولیٹری اتھارٹی (نیپرا) نے کے الیکٹرک کو 2024 سے 2030 تک کے لیے سات سالہ ٹیرف کی منظوری دے دی ہے۔ اس منظوری کے تحت کے الیکٹرک کو بجلی کے ڈسٹری بیوشن بزنس پر فی یونٹ 3 روپے 31 پیسے کا ٹیرف دیا گیا ہے۔
نیپرا کے مطابق، کے الیکٹرک نے ڈسٹری بیوشن بزنس کے لیے 3 روپے 83 پیسے فی یونٹ کا ٹیرف مانگا تھا، تاہم اسے کم ٹیرف دیا گیا ہے۔ بجلی ٹرانسمیشن کے لیے کے الیکٹرک کو 2 روپے 98 پیسے فی یونٹ کا ٹیرف دیا گیا ہے۔
نیپرا نے بجلی ڈسٹری بیوشن پر 14 فیصد اور ٹرانسمیشن پر 12 فیصد ریٹرن آن ایکویٹی (واپسی منافع) کی منظوری دی ہے۔
ذرائع کے مطابق، وفاقی حکومت کی مخالفت کے باوجود کے الیکٹرک کو ڈالر بیسڈ منافع کی اجازت دی گئی ہے، جو صارفین کے لیے اہم نکتہ رہا ہے۔
ٹیرف کی سماعت کے دوران صارفین نے ڈالر بیسڈ منافع کی سخت مخالفت کی تھی اور موقف اپنایا تھا کہ کے الیکٹرک کوئی انڈیپینڈنٹ پاور پروڈیوسر (IPP) نہیں، اس لیے منافع کی یہ سطح مناسب نہیں۔
نیپرا کی جانب سے اس منظوری کو کے الیکٹرک کے کاروباری استحکام اور بجلی کی ترسیل کے معیار کو بہتر بنانے کے لیے ایک اہم قدم قرار دیا جا رہا ہے، جس سے ملک کے سب سے بڑے بجلی فراہم کنندہ کے لیے مستقبل میں سرمایہ کاری کے دروازے کھلنے کی توقع ہے۔
