کالعدم تحریک لبیک کے جنوبی پنجاب کے ٹکٹ ہولڈرز کا پارٹی سے علیحدگی کا اعلان
لاہور (نیوز ڈیسک) — کالعدم تحریک لبیک پاکستان (ٹی ایل پی) کے جنوبی پنجاب کے ٹکٹ ہولڈرز نے پارٹی سے علیحدگی کا اعلان کرتے ہوئے کہا ہے کہ تنظیم کے حالیہ احتجاج اور لانگ مارچ کا کوئی جواز نہیں تھا۔ ان کا کہنا ہے کہ ملک کو درپیش بیرونی چیلنجز کے باوجود احتجاج کی کال دینا غیر مناسب اور نقصان دہ عمل تھا۔
لاہور میں پریس کانفرنس کرتے ہوئے سابق ٹکٹ ہولڈرز نے واضح کیا کہ وہ بغیر کسی دباؤ کے تحریک لبیک سے علیحدہ ہورہے ہیں۔ ان کا کہنا تھا کہ ٹی ایل پی کے پاس فلسطین کے نام پر احتجاج کا کوئی جواز نہیں تھا، کیونکہ فلسطینی خود معاہدے پر مطمئن تھے، مگر یہاں بلا وجہ احتجاج کی کال دی گئی۔
محمد حسین بابر نے کہا کہ ملک اس وقت مشکل حالات سے گزر رہا ہے، اس لیے انتشار پھیلانے کی بجائے استحکام کی ضرورت ہے۔ راؤ عارف سجاد نے کہا کہ پاکستان انتشار کا متحمل نہیں ہوسکتا اور ہمیں دشمن قوتوں کے عزائم کو ناکام بنانا ہوگا۔
رہنماؤں کا کہنا تھا کہ پاکستان کلمہ طیبہ کے نام پر حاصل کیا گیا ہے اور یہ ملک تاقیامت قائم و دائم رہے گا۔ کوئی بھی قوت پاکستان کی سالمیت کو نقصان نہیں پہنچا سکتی۔
